Net deth diuendres ath dissabte tamb nheuades en Aran.

Era prediccion d'aguesta dimenjada ei un shinha imprecisa, donques que mos trauessarà ua borrasca qu'en tot depéner que se place uns quilomètres cap ath nòrd o cap ath sud pòt provocar cambis en temps previst. Açò se nòte ena variabilitat entre es desparièrs modèls meteorologics. Més ac vam a sajar:

Aué diuendres 24 de març, auram un maitin damb alternancia de bromes e clari; a compdar de meddia aumentarà era nivolositat e pera tarde se produsiràn quauques precipitacions moderades que pera net poderien èster puntuauments intenses. Còta de nhèu ath torn des 1.000 m en tot descéner puntuauments per jos es 800 m e pujnat a miejanet cap as 1300 m. Acumulacions d'entre 15 a 20 cm en còtes nautes. Vents doci de compausant sud pendent eth maitin. Pera tarde e net es vents seràn moderadi e de direccion nord-èst tamb quauqua bohada fòrta.
Temperatures heiredes entara epòca der an (0ºC/9ºC en hons de val; -8ºC/-1ºC en còta 2000).

Eth dissabte 25, pendent era maitiada e prumères ores deth maitin contunharàn es nheuades entre moderades e intenses damb còta de nhèu ath torn des 1300 m. A mesura qu'auance era jornada perderàn intensitat e se dauriràn quauqui clari. Era còta de nhèu descenerà cap as 800 m. Acumulacions d'entre 10 a 15 cm en còtes nautes. Vents moderadi deth nord-èst pendent eth maitin. Pera tarde es vents seràn fòrti tamb bohades fòrça fòrtes deth sud.
Temperatures un shinhau superiores ara jornada anteriora (1ºC/10ºC en hons de val; -6°C/-3ºC en còta 2000).

Eth dimenge 26 pendent eth maitin s'alternaràn bromes e clari; Era tarde serà pro assolelhada. Vents moderadi damb quauques bohades fòrtes deth sud.
Temperatures diürnes en ascens (2°C/15ºC en hons de val; -4ºC/0ºC en còta 2000).