Mostrando entradas con la etiqueta #Nhèu. Mostrar todas las entradas
Mostrando entradas con la etiqueta #Nhèu. Mostrar todas las entradas

28/1/19

Deluns damb nheuades intenses e vent ena Val d'Aran.

Aué deluns 28 de gèr, ei ua d'aguestes jornades ena que vos demanam era maximala precaucion, donques que se produsiràn precipitacions intenses que poderien deishar mès de 60 cm en còtes nautes e mès de 25 cm Vielha. Era còta de nhèu oscillarà entre es 700 e es 900 m. Vents fòrti deth nord-oest damb quauques bohades fòrça fòrtes.
Temperatures heiredes, normaus entara epòca, encara que, incrementada era sensacion de heired a causa deth vent (-2°/4° en Vielha; -6°/-4° en Beret).

Eth dimars 29, pendent eth maitin auram ua petita trèva que poderíe deishar veir quauque clar. A darrères ores aumentarà era nivolositat, era intensitat deth vent e se produsiràn quauques precipitacions damb còta de nhèu enes 900 m e en tot descéner pendent era net.
Temperatura similara ara jornada anteriora (-1°/5° en Vielha; -8°/-3° en Beret).

Eth dimèrcles 30, peth maitin auram encara bères precipitacions que serien de nhèu en totes es còtes. Pera tarde se dauriràn quauqui clari e anaràn desapareishent es nheuades.
Temperatura sense massa cambis (-2°/6° en Vielha; -9°/-3° en Beret).

#Nheuada #Nhèu

23/1/19

Eth dia dera gran nheuada.

Dempús de diuèrsi dies en tot anonciar-la, per fin ja auem era grana nheuada dera sason que mos deisharà celhs importanti, vos demanam maximala precaucion donques qu'i a avisi de nivèu vermelh tant deth SMC coma dera AEMET. Peth moment ja amiam mès de 15 cm en Vielha e mès de 30 cm ena Bonaigua 2.200. 

Aué dimèrcles 23 de gèr, serà un dia caperat damb precipitacions intenses e inclús fòrça intenses. Era còta de nhèu oscillarà entre es 600 e es 800 m pendent eth maitin e descenerà a totes es còtes pera tarde. Atencion as celhs acumuladi pendent tota era jornada que superaràn eth mètro en Baqueira 2.500 es 80 cm en Bagergue, es 40 cm en Vielha e es 20 cm en Bossost e Les.
De cara ara net era nheuada se moderarà.
Vents fòrts de nord-oest, damb bohades fòrça fòrtes pendent era tarde en zònes nautes.
Temperatures heiredes encara que damb sensacion termica fòrça baisha a causa dera accion deth vent (0°/4° en Bossòst; -3°/1° en Salardú).

Eth dijaus 24, pendent era maitiada auram nheuades moderades en totes es còtes, que pendent eth maitin s'afebliràn e que pera tarde desapareisheràn e se daurirà quauque clar. 
Vents moderadi de nord-oest damb quauques bohades fòrtes en zònes nautes e exposades.
Temperatures minimes en descenuda (-4°/3° en Bossòst, -6°/0° en Salardú).

Eth diuendres a prumères ores auram cèus sereni que s'anaràn embroman a mesura qu'auance eth maitin. Era tarde serà fòrça caperada damb precipitacions moderades que serien de nhèu peth dessús des 1.200 m. Vents moderadi deth nord-oest.
Temperatures en ascens sustot es diürnes (-2°/6° en Bossòst; -4/3° en Salardú).

#Nheuada