Arribe era nheuada que toti demoràuem

Aué deluns 9 de gèr auram ua jornada assolelhada damb quauques brumes a prumères ores e bromalhs nauti escampilhadi eth rèste dera jornada.
Temperatures en ascens respecte a jornades anteriores (0°/5°).

Eth dimars serà un dia d'iuèrn, damb nivolositat abondiua. Precipitacions fèbles pendent era maitiada damb còta de nhèu sus es 1.200 m. Peth maitin e pendent eth rèste dera jornada, es precipitacions seràn moderades e puntuauments intenses en tot descéner era còta cap as 900 m. Acumulacions superiores a çò de previst enes darrèri dies e que poderien superar es 50 cm en Vaquèira 2500 m.
Vents fòrts de direccion nòrd e noroest.
Temperatures similares ara jornada anteriora (0°/4°).

Eth dimèrcles seguiram damb precipitacions pendent era maitiada e prumères ores deth maitin en tot reméter cap a meddia. Còta de nhèu ath torn des 800 m pendent era maitiada, en tot pujar cap as 1200 ath meddia. Acumulacions que poderien superar es 20 centimètres en còtes nautes. Vents fòrts de nòrd.
Temperatures en ascens (2°/8°).

A causa dera variabilitat dera situacion, se s'aprècie quauque cambi ena prediccion, realizaram un bulletin aguesta tarde.
Bona nheuada a toti.