28/2/18

Situacion de sud: Vent d'Espanha ena Val d'Aran.

Aué dimèrcles 28 de hereuèr, serà ua jornada caperada damb precipitacions entre fèbles e moderades, qu'amendriràn d'intensitat a mesura que mos desplacem cap ath nòrd. Per didé'c de quauque manera: en Espitau de Vielha pòden arribar a quèir mès de 40 cm de nhèu, en Vielha de 10 a 20 mm principlaments de ploja, en Les era precipitacion serà entre 5 e 10 mm e en Saint Gaudens non ploirà guaire.
Era còta de nhèu serà de 600 m pendent era maitiada en tot pujar cap as 1200 m pendent eth maitin e as 1800 m pera tarde e net. Acumulacions d'uns 20 cm en còtes nautes encara qu'en vessant sud se superarà es 50 cm de nhèu naua.
Vents fòrti de sud e sud-est damb bohades fòrça fòrtes pera tarde.
Temperatures minimes heiredes, encara que pendent era jornada notaram un notable ascens incrementat pera accion deth vent d'Espanha (-5°/8° en hons de Val; -10°/0° en còta 2.000).

Eth dijaus contunharam damb nivolositat abondiua encara que pendent eth maitin se poderien daurir quauqui clari esporadics. Precipitacions fèbles, puntuauments moderades. Damb còta de nhèu suses 1900 m. Vents fòrti deth Sud.
Temperatures en ascens sustot es maximales (3°/16° en hons de Val; 0°/2° en còta 2.000).

Eth diuendres peth maitin semble qu'auram ua trèva, damb cèus pro sereni, encara que damb quauqui intervaus embromadi. Pera tarde aumentarà era nivolositat. Vents moderadi de sud-oest.
Temperatures minimes similares; es maximales se demoraràn un shinhau mès cuertes (3°/11° en hons de Val; -5°/0°).