Jornades pro assolelhades e damb temperatures diürnes doces. En tot demorar eth cambi de temps a compdar deth diuendres.

Aué dimars 14 de gèr, auram un maitin assolelhat damb quauqui bromalhs nauti que desapareisheràn pendent era tarde. Brises fèbles deth sud.
Temperatures un shinhau peth dessús des abituaus entara epòca (-1°/12° en Les; -2°/3° en Plan de Beret).

Eth dimèrcles 15, pendent eth maitin tornaram a auer bromalhs nauti e primi que embaranaràn leugèraments eth solei. Pera tarde era nivolositat serà mès destacabla.
Temperatura similara ara jornada anteriora (-2°/13° en Les; -2°/2° en Plan de Beret).

Eth dijaus 16, serà assolelhat damb quauqui bromalhs mieis a darrères ores. Vents fèbles deth sud.
Darrèra jornada damb temperatures peth dessús des normaus entà miei gèr (-1°/14° en Les; -3°/1° en Plan de Beret).

Contunham pendents deth cambi de temps que semble que mos va a afectar a compdar deth diuendres e que poderie deishar es prumères nheuades importantes der an, mos ac calerà confirmar.