6/3/20

Diuendres e dissabte peth maitin damb nheuades que deisharàn mès de 60 cm en Baqueira 2.500. Eth dimenge poderie èster era melhor jornada de ski der an.

Aué diuendres 6, serà ua jornada iuernau, pro caperada damb quauques clarulhes pendent era maitiada e prumères ores deth maitin. Se produsiràn precipitacions fèbles peth maitin e de moderades a intenses pendent era tarde e net. Era còta de nhèu se plaçarà ath torn des 700 m encara que puntuauments poderie descéner quauquarren mès. Acumulacions de 40 cm en Baqueira 2.500, uns 25 cm en Bagergue e ath torn de 15 cm en Vielha.
Atencion pendent era tarde ath vent de nòrd-oest que serà intens, damb quauques bohades fòrça fòrtes e que provocaràn "Torberes". De totes formes pas se demore qu'es bohades maximes siguen tan violentes coma es deth principi de setmana.

Cau èster prudenti damb es desplaçaments, sustot pera tarde e net, donques qu'i a avisi iranja per nhèu e vent de Aemet e de Meteocat.
Temperatures iuernaus damb ua sensacion de heired per jos des -15°C a causa deth vent (-1°/5° en Betren; -8°/-6° en Beret).

Eth dissabte 7, encara auram nivolositat abondiua, mèsque pera tarde se poderie daurir bèra clarulha. Seguiràn es nheuades peth dessús des 700 m, de moderades a intenses pendent era maitiada e eth maitin. S'acumularàn de 25 a 30 cm en còtes nautes, de 10 a 15 cm en Bagergue e de 5 a 10 cm en Vielha. Es borrats tenderàn a desapareisher pendent era tarde.
Vents moderadi de nòrdoest damb bères bohades fòrtes de maitiada
Es temperatures contunharàn en tot èster de plen iuèrn (0°/7° en Betren; -8°/-3° en Beret).

Eth dimenge 8, semble qu'auram era melhor jornada d'esquí de çò qu'amiam d'an damb un maitin fòrça assolelhat. Pera tarde apareisherà un shinhau de nivolositat que mos poderie deishar bèra fèbla precipitacion pendent era net.
Temperatures minimes heiredes,ath temps que es maximales pujaràn notablaments (0°/12° en Betren; -7°/-1° en Beret)