Diuendres damb precipitacions intenses ath torn de meddia e damb un shinhau de nhèu en còtes nautes. Dimenjada variabla e damb temperatures heiredes entà principis d'octobre.

Aué diuendres 2, serà pro caperat. Eth pas dera borrasca Alex provocarà precipitacions entre moderades e intenses, sustot ath torn de meddia e prumères ores dera tarde. Es plojats començaràn de maitiada ena zòna mès meridionau dera val e s'esteneran ath long deth maitin per tot eth territòri. Es precipitacions anaràn aloishant ja auançada era tarde.
Era còta de nhèu se plaçarà enes 2.400 m pendent era maitiada, en tot descéner cap as 2.000 m peth maitin e ath torn des 1.600 pera tarde, encara que puntuauments quauqui flòcs se poderien escapar en còtes inferiores. Acumulacions de 10 a 15 cm de nhèu en Còta 2.500.
Vents deth sud damb quauqua bohada fòrta a prumères ores, en tot virar ath nòrd pendent era jornada.
Temperatures en descenuda ath long dera jornada, e tamb ues minimes un shinhau mès nautes a causa deth vent deth sud (9º/11º en Arròs; 8º/10º en Escunhau).

Eth dissabte 3, pendent eth maitin s'alternaràn bromes damb clars e se poderie produsir quauque plojat fèble e isolat. Era tarde serà mès embromada e damb mès probabilitat de precipitacions fèbles, puntuauments moderades. Còta de nhèu ath torn des 1.800 m e acumulacions de 5 a 10 cm en còtes nautes. Vents fèbles deth sud damb bera bohada moderada en zònes nautes.
Es temperatures contunharàn per jos es normaus (4º/12º en Arròs; 3º/11º en Escunhau).

Eth dimenge 4 auram nivolositat intercalada damb quauques clarulhes. Se produsirà bera precipitacion fèbla, sustot pendent era tarde e damb ua còta de nhèu sus es 1.800 m. Se pòden acumular entre 5 a 10 cm mès en còtes nautes.
Temperatures sense cambis (4º/13º en Arròs; 4º/12º en Escunhau).